Eski davlat standartlari Oʻzbekistonning JSTga qoʻshilishiga toʻsqinlik qilmoqda

Quyi palata “Uzstandart” direktori Ansabxon Zakirovga texnik jihatdan tartibga solishni isloh qilish, raqamlashtirish, korrupsiya xavflari va standartlarni yangilash masalalari boʻyicha soʻrov yubordi.

Soʻrovni Oʻzbekiston Liberal-demokratik partiyasi fraksiyasi hamda Tadbirkorlik, raqobatni rivojlantirish va sanoat masalalari qoʻmitasi tashabbus qilgan. Zakirov toʻrtta asosiy masala boʻyicha asoslantirilgan tushuntirishlar taqdim etishi kerak, biroq ularning roʻyxati yigʻilishda eʼlon qilinmadi.

Deputat Nodira Jonibekova tekshiruvlar texnik jihatdan tartibga solish sohasida korrupsiya xavflarini aniqlash va kamaytirish bilan bogʻliq muammolar borligini koʻrsatganini maʼlum qildi. Uning soʻzlariga koʻra, raqamli yechimlarni joriy etishni tezlashtirish, ortiqcha byurokratiyani qisqartirish va manfaatlar toʻqnashuvining oldini olish ham zarur.

Normativ baza holati ham alohida muhokama qilindi. Oʻzbekistonda qariyb 33 mingta standart amal qiladi, ularning taxminan yarmi eskirgan yoki xalqaro talablarga mos kelmaydi. Jonibekova buni mamlakatning Jahon savdo tashkilotiga qoʻshilishiga toʻsqinlik qilayotgan omil deb atadi, chunki texnik jihatdan tartibga solish tizimining xalqaro standartlarga muvofiqligi aʼzolik shartlaridan biridir.

Quyi palata matbuot xizmati parlament sohaning joriy holati, korrupsiyaning oldini olish, raqamlashtirish va standartlarni yangilash choralari, shuningdek, boshqa dolzarb masalalar haqida maʼlumot soʻraganini aniqlashtirdi.