Uzbekistan Airways va yana toʻrtta korxona yaqin ikki yil ichida IPO oʻtkazishi mumkin

5-noyabr kuni Toshkentda Iqtisodiyot va moliya vazirligi Oʻzbekistonning beshta tashkilotini fond bozoriga chiqarishga tayyorgarlik koʻrilayotganini maʼlum qildi. Roʻyxatga Uzbekistan Airways, «Oʻzbekiston milliy elektr tarmoqlari», «Oʻzbekgidroenergo», «Oʻzbektelekom» va «Oʻzsanoatqurilishbank» (SQB) kiritilgan.

Hozir kompaniyalar va bank transformatsiya jarayonidan oʻtmoqda, shuningdek, oʻz faoliyatini xalqaro kapital bozorlari meʼyorlariga muvofiqlashtirmoqda. Aksiyalarni joylashtirish 2027–2028-yillarga rejalashtirilgan, shu sababli IPO hali oʻtkazilgani yoʻq.

Vazirlik Milliy investitsiya jamgʻarmasi aksiyalarining birlamchi joylashtirilishi haqida ham hisobot berdi. Bu yil London va Toshkent fond birjalarida IPO orqali uning aksiyalarining 35,45 foizi 692 mln dollarga sotildi.

Xorijiy investorlar bilan ishlash uchun 14-oktabr kuni 250 nafardan ortiq xorijiy ishtirokchini jamlagan Investors Day tadbiri oʻtkazildi. 16-oktabr kuni boʻlib oʻtgan Corporate Governance Day 2026 uchrashuvida korporativ boshqaruvni rivojlantirish ustuvor yoʻnalishlari koʻrib chiqildi.