Markaziy bank: soʻmdagi omonatlar stavkasi bir yilda 2 foizdan koʻproqqa pasaydi

Bir yil davomida stavka 2,1 foizga, 2026 yil boshidan esa 1,7 foizga pasaydi.

Bir yilgacha boʻlgan muddatli depozitlar boʻyicha oʻrtacha stavka bir oyda 0,3 foizga oshib, 14,2 foizga yetdi. Shu bilan birga, u bir yil davomida 3,4 foizga kamaydi. Uzoq muddatli omonatlar avgustdagi pasayishdan soʻng 18,1 foizgacha oshdi, biroq ularning daromadliligi yil davomida 1,7 foizga qisqardi.

Aholi uchun soʻmdagi omonatlar boʻyicha oʻrtacha stavka 18,4 foizni tashkil etdi — bu oʻtgan yilgi darajadan qariyb 3 foizga past. Qisqa muddatli depozitlar stavkasi bir oyda 0,7 foizga oshib, 15,6 foizga yetdi, biroq bir yil davomida 5 foizdan koʻproqqa pasaydi. Uzoq muddatli segmentda daromadlilik 18,8 foizni tashkil etdi: bu avgustdagi koʻrsatkichdan 0,1 foizga kam va oʻtgan yil sentabridagi darajadan 2,6 foizga past.

Inflyatsion kutilmalar hisobga olingan holda hisoblangan soʻmdagi omonatlarning real daromadliligi yangi rekordni qayd etib, 8,9 foizga yetdi. Bir oyda u 1 foizga, bir yilda esa 0,6 foizga oshdi.

Yuridik shaxslar uchun omonatlar boʻyicha oʻrtacha stavka apreldan beri ilk bor 15 foizgacha pasaydi. Bir oylik pasayish 0,5 foizni, yillik pasayish esa 2,1 foizni tashkil etdi. Kompaniyalarning bir yilgacha boʻlgan muddatli depozitlari oʻrtacha 13,3 foiz stavkada joylashtirildi, bu oʻtgan yilgi darajadan 2,7 foizga past. Uzoq muddatli hisobvaraqlar boʻyicha koʻrsatkich 16,1 foizni tashkil etib, bir yil davomida 1,6 foizga kamaydi.

Biznes depozitlarining real daromadliligi avvalgi oy darajasida — 5,3 foizda qoldi. Regulyator buni kutilayotgan inflyatsiyaning oʻzgarishi bilan izohladi; bir yil davomida koʻrsatkich 0,4 foizga oshdi.

Valyutadagi omonatlar boʻyicha oʻrtacha stavka 5,5 foizgacha oshganidan soʻng iyuldagi darajaga — 4,4 foizga qaytdi. Bunga qisqa muddatli hisobvaraqlar daromadliligining qariyb ikki baravarga pasayib, 2,6 foizga tushgani taʼsir koʻrsatdi. Shu bilan birga, bir yildan ortiq muddatli depozitlar boʻyicha stavka 5,7 foizgacha oshdi.

Jismoniy shaxslar uchun valyutadagi omonatlar daromadliligi avgustdagi darajada — 5,4 foizda saqlanib, bir yil davomida 0,3 foizga oshdi. Uzoq muddatli segmentda stavka 5,8 foizgacha koʻtarildi.

Biznesning valyutadagi depozitlari boʻyicha oʻrtacha daromadlilik 2,8 foizgacha pasaydi, bu oʻtgan yil oktabridagi koʻrsatkichdan 2,3 foizga kam. Qisqa muddatli hisobvaraqlar 2,5 foiz stavkada taklif qilindi, bu avvalgi oy koʻrsatkichidan 3,1 foizga past. Uzoq muddatli depozitlar boʻyicha stavka 4,4 foizni tashkil etib, 1,5 foizga kamaydi.