Nurafshonda «Kelajak texnologiyalari markazi»ni tashkil etish rejalashtirilmoqda
Robotlar, elektronika va uskunalar ishlab chiqaruvchilar imtiyozlardan foydalanishi mumkin
Prezident Shavkat Mirziyoyev elektrotexnika sanoati vakillari, shu sohada faoliyat yuritayotgan tadbirkorlar va investorlar bilan uchrashuv oʻtkazdi.
Soʻnggi oʻn yil ichida sohaga $2 mlrd investitsiya kiritilib, 413 ta yangi ishlab chiqarish quvvati ishga tushirildi. Kompaniyalar maishiy texnika, quyosh panellari, elektron hisoblagichlar va yuqori kuchlanishli transformatorlarni ham oʻz ichiga olgan 100 dan ortiq turdagi mahsulot ishlab chiqarishni boshladi.
Joriy yilda elektrotexnika sanoatida ishlab chiqarish hajmi 2016 yildagi 1,7 trln soʻmga nisbatan 50 trln soʻmga yetdi. Investitsiyalar $600 mlnni, eksport esa $1,6 mlrdni tashkil qildi. Oʻtgan davrda xorijga yetkazib berish hajmi 14 baravar oshdi.
Mirziyoyev bu natijalar hozircha sohaning salohiyatiga mos emasligini taʼkidlab, shu bois uni rivojlantirishni jadallashtirish zarurligini qayd etdi.
Uchrashuvda elektrotexnika uchun asosiy xomashyo turlaridan biri boʻlgan mis ishlab chiqarishga alohida eʼtibor qaratildi. Joriy yilda uchinchi mis boyitish fabrikasi foydalanishga topshirildi. Loyiha amalga oshirilgach, mis ishlab chiqarish hajmi 300 ming tonnagacha yetkaziladi, 2030 yilga borib esa bu koʻrsatkichni 500 ming tonnagacha oshirish rejalashtirilgan.
Mamlakatda quyosh va shamol elektr stansiyalari qurilmoqda, energiyani saqlash quvvatlari yaratilmoqda, hududlarda esa keng koʻlamli qurilish ishlari davom etmoqda. Kelgusi oʻn yil ichida hamkorlar bilan birgalikda $450 mlrdlik loyihalarni amalga oshirish rejalashtirilgan.
Prezidentning soʻzlariga koʻra, bu elektrotexnika mahsulotlari uchun uzoq muddatli sotuv bozorini shakllantiradi. U sohani rivojlantirish omillari sifatida mis va oʻta muhim minerallar zaxiralarini, yosh mutaxassislarni, shuningdek, hamkorlikka tayyor tadbirkorlar va investorlarni sanab oʻtdi. Bu imkoniyatlarni yangi texnologiyalar va ishlanmalar bilan birlashtirish rejalashtirilgan.
Mamlakatda allaqachon toʻqimachilik sanoati, metallga ishlov berish, qurilish va boshqa yoʻnalishlar uchun uskunalar ishlab chiqaradigan oʻnlab korxonalar faoliyat yuritmoqda. «Ohangaron» texnoparkida mikroprotsessor modullari ishlab chiqarilmoqda, Toshkentda esa janubiy koreyalik hamkorlar bilan birgalikda robotlar ishlab chiqarish loyihasi ishga tushirildi.
Hukumat bunday korxonalar sonini koʻpaytirib, yagona ekotizim yaratishni rejalashtirmoqda. U iqtisodiyot tarmoqlarini zamonaviy uskunalar, sanoat robotlari va elektron mahsulotlar bilan taʼminlashi kerak.
Nurafshonda «Kelajak texnologiyalari markazi» tashkil etiladi. Uning korxonalariga IT Park rezidentlari darajasidagi imtiyozlar beriladi. Robotlar, elektronika va texnologik uskunalar ishlab chiqarish uchun xomashyo hamda butlovchi qismlarni olib kirish bojxona bojlaridan ozod qilinadi. Ushbu sohalardagi ilmiy ishlanmalardan olinadigan daromadlar ham soliqqa tortilmaydi.
Fan va sanoat oʻrtasidagi aloqalarni mustahkamlash uchun «Yangi sanoat» milliy platformasi ishlab chiqiladi. U kelajak texnologiyalari ustida ishlayotgan tadqiqotchilarni sanoat korxonalari bilan birlashtirishi kerak.
1 mayga qadar har bir hududda bittadan ilmiy-tadqiqot markazini (R&D) tashkil etish yoki texnoparkni yangi sanoat yoʻnalishlariga qayta ixtisoslashtirish topshirildi. Bundan tashqari, hududlarda mahsulotlarni sinovdan oʻtkazish maydonchalari tashkil etiladi. Ular yirik korxonalar va kichik biznes oʻrtasidagi kooperatsiyani kuchaytirishi kerak.
Masʼul idoralarga ikki hafta ichida robototexnikani rivojlantirish boʻyicha qaror loyihasini tayyorlash ham topshirildi. 1 martga qadar mashinasozlik uskunalari va elektronika tarmoqlarini qoʻllab-quvvatlashning kompleks dasturini ishlab chiqish lozim.
