Pedagoglar ipoteka subsidiyasi uchun onlayn ariza topshirish huquqiga ega
Qayta moliyalashtiriladigan ipoteka boʻyicha dastlabki badalning 25 foizini davlat budjeti qoplaydi
Portal yoki ilovada avtorizatsiyadan oʻtgach, «Uy-joy sotib olish uchun pedagoglarga subsidiya» xizmatini topish, maʼlumotlarni kiritish va arizani yuborish kerak. Shuningdek, davlat xizmatlari markazlariga ham murojaat qilish mumkin — bu tartib bepul.
Dasturga 2026-yil 19-fevraldagi Vazirlar Mahkamasi qarori asos boʻladi. Qoʻllab-quvvatlash uchun 60 yoshga toʻlmagan, kamida 15 yillik ish stajiga ega hamda bosh oʻqituvchi lavozimiga mos keladigan oliy malaka toifasiga ega pedagoglar daʼvogarlik qilishi mumkin.
Dastur ishtirokchilariga taʼlimning barcha bosqichlaridagi muassasalarda ishlaydigan xodimlar — maktablar va akademik litseylardan tortib texnikumlar, kollejlar hamda oliy taʼlim muassasalarigacha — aylanishi mumkin. Subsidiya doimiy yashash joyi boʻyicha birlamchi bozordan kvartira sotib olish uchun moʻljallangan. Toshkent aholisi uchun Toshkent viloyatidan ham uy-joy sotib olish imkoniyati mavjud.
Ariza tekshirilayotganda pedagogning ish staji, hozirgi ish joyi, malaka toifasi, kredit tarixi, shuningdek, uning va turmush oʻrtogʻining koʻchmas mulki haqidagi maʼlumotlar hisobga olinadi. Er-xotin nomiga ikki yoki undan ortiq turar joy obyekti rasmiylashtirilmagan boʻlishi kerak. Shuningdek, ulardan hech biri ilgari uy-joy subsidiyasini olmagan boʻlishi lozim.
Dasturni davlat budjetidan har yili moliyalashtirish hajmi 200 mlrd soʻmgacha boʻlishi mumkin.
