Oʻzbekiston Norvegiyadagi xalqaro seminarda migratsiya ustuvor yoʻnalishlarini taqdim etdi
Respublika migratsiya va readmissiya sohasida Shvetsiya bilan allaqachon kelishuvga ega
Yillik seminarni Xalqaro migratsiya tashkiloti (IOM) va Norvegiya Immigratsiya direksiyasi (UDI) tashkil etdi. Ishtirokchilar migratsiya sohasidagi xalqaro hamkorlik, migrantlarning ixtiyoriy qaytishi va reintegratsiyasini muhokama qildi.
Tadbirda Norvegiya davlat idoralari, IOM va Yevropa Ittifoqi vakillari, shuningdek, 50 dan ortiq elchixonaning rahbarlari va xodimlari soʻzga chiqdi. Oʻzbekiston seminarda ilk bor qatnashdi.
Panel sessiyasida Nurimbetov mamlakat migratsiya siyosatining ustuvor yoʻnalishlari va 2026-yil 2-noyabrdagi yigʻilishda belgilangan vazifalar haqida soʻzlab berdi. Uning aytishicha, soʻnggi yillarda Oʻzbekistondan uyushgan mehnat migratsiyasi yoʻnalishlari geografiyasi 3 ta davlatdan 27 ta davlatgacha kengaygan.
Yevropalik hamkorlarga taklif etilayotgan model tartibli qaytish va readmissiyani malakali mutaxassislar mehnat migratsiyasining qonuniy kanallari bilan uygʻunlashtirishni nazarda tutadi. Model, shuningdek, malakalarni tan olish va kasbiy tayyorgarlikni ham oʻz ichiga oladi. Elchi bunga misol sifatida Oʻzbekiston va Shvetsiya oʻrtasidagi migratsiya va readmissiya sohasidagi kelishuvni keltirdi. Kelishuv diplomatik pasport egalari uchun vizasiz rejimni ham nazarda tutadi.
Elchixona Norvegiya va Daniyada ham shunga oʻxshash yondashuvni ilgari surmoqda. U migratsiya idoralari, ish beruvchilar uyushmalari va diplomlarni tan olish bilan shugʻullanuvchi tashkilotlar bilan hamkorlik qilmoqda. Seminar davomida Oʻzbekiston tomoni vakillari Norvegiya Adliya va jamoat xavfsizligi vazirligi hamda UDI bilan ikki tomonlama hamkorlik formatlarini alohida muhokama qildi.
