Oʻzbekistonda bankomatlarni mahalliy ishlab chiqarish imkoniyati oʻrganiladi
2025-yilda mamlakat 9 mingta qurilmani 50 mln dollardan ortiq qiymatga import qilgan
Prezident Shavkat Mirziyoyev bankomatlarni mamlakat ichida ishlab chiqarish imkoniyatini oʻrganishni topshirdi; 2025-yil davomida Oʻzbekistonga 9 mingta qurilma 50 mln dollardan ortiq qiymatga import qilingan. Mirziyoyev, shuningdek, ichki talabni hisoblash, zarur texnologiyalar va investorlarni jalb etishni taklif qildi.
Yigʻilishda qayd etilganidek, yangi turar joy massivlari, savdo va koʻngilochar majmualar qurilishi fonida bankomatlarga boʻlgan ehtiyoj har yili oshib bormoqda. Elektr-texnika sohasi investorlari va tadbirkorlari bilan uchrashuvda prezident bu sohada «texnologik sakrash» zarurligini taʼkidladi.
Davlat rahbari boshqa yuqori texnologiyali mahsulotlarni ham mahalliylashtirish imkoniyatlarini alohida qayd etdi. Uning soʻzlariga koʻra, Toshkent viloyatida akkumulyatorlar va elektronika uchun mis folga ishlab chiqarishni yoʻlga qoʻyish mumkin.
Jizzaxda invertorlar va elektr transporti uchun quvvatlash stansiyalarini ishlab chiqarishni tashkil etish taklif qilinmoqda. Namanganda suv nasoslari uchun energiya tejamkor elektr dvigatellarini ishlab chiqarish masalasi koʻrib chiqilmoqda.
Uchrashuvda qayd etilganidek, Qoraqalpogʻistonda uzluksiz elektr taʼminoti manbalari va serverlar uchun sovitish tizimlarini ishlab chiqarish salohiyati mavjud.
Avvalroq Markaziy bank bankomatlardan pul yechishdagi muammolar haqidagi shikoyatlarni xolisona tekshirishga chaqirgan edi.
