Toshkentdan Astanaga va Olmaotaga reyslar sonini haftasiga 60 tagacha oshirish rejalashtirilmoqda
Mamlakatlar oʻrtasidagi boshqa yoʻnalishlarda esa avvalgi 14 ta oʻrniga haftasiga 20 tagacha reysni amalga oshirishga ruxsat beriladi
Muzokaralar Toshkentda fuqaro aviatsiyasi sohasidagi hamkorlikka bagʻishlangan «Xitoy — Markaziy Osiyo» ishchi guruhi konferensiyasida boʻlib oʻtdi. Qozogʻiston delegatsiyasiga Qozogʻiston Transport vazirligi Fuqaro aviatsiyasi qoʻmitasi raisi Saltanat Tompiyeva, Oʻzbekiston delegatsiyasiga esa Oʻzbekiston Transport vazirligi Havo transporti boshqarmasi boshligʻi Jamoliddin Nazarov rahbarlik qildi.
Ishtirokchilar aviaqatnovlarning kengayishini parvozlarga talabning ortishi, shuningdek, mamlakatlar oʻrtasidagi biznes va turistik almashinuvlarning faollashgani bilan izohladi. Reyslar chastotasiga oid yangi cheklovlar eng koʻp talab qilinadigan yoʻnalishlarda taklif hajmini oshirish imkonini berishi kutilmoqda.
